[Kidung-Sunda] SAWER OROK

SAWER OROK

1.         Bismillah damel ngawitan

Mugi Gusti ngawidian

Nyarioskeun pangaturan

Damelanana pangeran

2.      Pangeran nu langkung kersa

Sagala mani tiasa

Pepek eusi dunya rosa

Ana jleg jadi manusa

3.         Manusa kersa yang widi

Muntang ka dat maha suci

Nyucruk lacak tapak tadi

Asal tina nur Ilahi

4.      Nur cahya bakal manusa

Manusa mawadah rasa

Rasa ngarasa rumasa

Kersaning maha kawasa

5.         Kersaning yang maha agung

Nur cahya netes ka indung

Teu matak ngajadi bingung

Sanajan beuteung melendung

6.      Salapan bulan dikandung

Di garba indung nyalindung

Tiheula teu boga luhung

Sumawonna hirup linglung

7.         Sabulan eukeur ngaherang

Kasorot cahya gumilang

Sateuacanna rumingkang

Teu keueungan teu hariwang

8.      Dua bulan keur lumenggang

Teu acan keneh kasawang

Ngantosan hoyong anjaclang

Dunya nu bakal kosorang

9.         Katilu bulan gumulung

Di lebet kandungan indung

Teu aya bae pangjurung

Pasrah ka nu Maha Agung

10.    Ka opat bulan mangrupa

Tapi keukeuh teu ngarasa

Rasa ti indung ti bapa

Nu jadi panggeuing rasa

11.       Lima bulan nembe usik

Sakedik demi sakedik

Raga nyawa bibirintik

Ngempel sautak saeutik

12.    Genep bulan bade malik

Kantun ngantos ngoyong calik

Manawi bisa katungtik

Rasa hirup kapimilik

13.       Tujuh bulan maju kolot

Tapi soca teu molotot

Leungeun tara cukat cokot

Sumawonna sosorongot

14.    Kadalapan bulan ngora

Ka dunya tereh ngumbara

Jauhkeun rasa sangsara

Deukeutkeun rasa gumbira

15.       Salapan sapuluh medal

Ngagoar orok katingal

Indung beurang gaduh akal

Kop nyokot kasur jeung bantal

16.    Dirawu ku indung beurang

Ibu rama suka senang

Tatangga pada daratang

Rabul pada hoyong terang

17.       
Hoyong terang ka putrana

Nu nembe lahir ka dunya

Euleuh ituh heunteu nyana

Mani bijil cahayana

18.    Cahayana mani mancur

Mani guyur salelembur

Silih taros sareng batur

Hayu urang muji sukur

19.       Muji sukur ka yang widi

Putrana mugi abadi

Sing tiasa mawa diri

Diri pangasih ti gusti

20.    Gusti Allah sipat wenang

bral utun ngalanglang

ka alam dunya nu caang

masing jadi jalma senang

21.       Sing senang utun ayeuna

Sing panjang punjung yuswana

Sing ageng dina milikna

Sing soleh utun manahna

22.    Utun ku indung beurangna

Dijaga di dama-dama

Diurus siang wengina

Ku ibu sareng ku rama

23.       Ibu rama muji nuhun

Salamet ayeuna utun

Katampi Gusti kasuhun

Ku indung beurang dilahun

24.     Indung beurang mepelingan

Utun ulah kajongjonan

Dina alam pawenangan

Regepkeun badan sorangan

25.       Regepkeun utun ayeuna

Kupangdangu duanana

Ulah sadangu-danguna

Mun lain danguenana

26.     Pangdangu sareng socana

Soca ningal duanana

Ulah satingal-tingalna

Lain tingalieunana

27.       Soca sareng pangambungna

Liang anu duanana

Ulah saangseu-angseuna

Mun lain angseunana

28.     Pangambung sareng bahamna

Baham sareng pangucapna

Ulah saucap-ucapna

Mun lain ucapeunana

29.       Pangusap sareng leungeunna

Mun leungeun bade nyokotna

Ulah sacokot-cokotna

Mun lain cokoteunana

30.    Leungeun paranti nyokotna

Mun suku keur nincakna

Ulah satincak-tincakna

Mun lain tincakeunana

31.       Nincak jalan nu sampurna

Dunya katut akheratna

Nyicingan rasa ni’matna

Supaya waras bandanna

32.    Waras badan suci ati

Pikiran madep ka Gusti

Mugi sing jauh balai

Sing seueur utun rejeki

33        Ku tutun masing kaharti

Pepeling ibu paraji

Utun jaga kudu ngarti

Ulah hayang ku pamuji

34.    Puji nuhun laksa keti

Pepeling ibu paraji

Sakitu oge kaharti

Manga urang ngahariji

35.       Ngahiji kumpul baraya

Tuangeun tos sadia

Wayahna saaya-aya

Nyanggakeun manga sadaya

36.    Sadaya para wargina

Barungah dina manahna

Ningal nu janten ibuna

Damang dina salirana

37.       Mugi damang saterasna

Ulah aya kakirangna

Cicing dina gumbirana

Nu janten ibu ramana

38.    Ibu rama muji sukur

Ka Gusti Allah nu ngatur

Ka para nabi nu mashur

Anu masihan pitutur

39.       Pitutur para rosulna

Rawuh para sahabatna

Sinareng para walina

Katut para karuhunna

40.    Ka karuhun sadayana

Neda jembar hampurana

Mugi  nu janten putrana

Gusti nangtayunganana

41.       Gusti nu langkung heman

Mugi sadaya sing iman

Nya netepan ka Islaman

            Sing tiasa ngalenyepan

42      Lenyepan mangga sadaya

Ambeh teu pakia-kia

Sadaya geuning baraya

Sauyunan hirup mulya

           43.       Mulyana hirup didunya

           Pek utun jaga tatanya

           Tatanyana kudu enya

           Bandanna buru ditanya

44.    Tanya atuh ku hatena

Asalna urang ti mana

Mun mulang bade kamana

Mun caang tangtu sampurna

         45.       Sampurna dunya akherat

         Disarengan sareng salat

         Ka ibu ka rama ta’at

         Pangdo’a sepuh mangpa’at

46.    Mangpa’at lahir jeung batin

Utun the masih prihatin

Jaga pikir masing tigin

Ka Gusti Robul Alamin